Саха тэлэбиидинньэтин «Саҥа күн» биэриитигэр А.П. Павлов уонна М.Н. Данилова кыттыыны ылан кэллилэр.

Бугун сарсыарда, Саха тэлэбидиэнньэтин «Саҥа күн» биэриитигэр Алексей Прокопьевич Павлов уонна Мария Никитична Данилова кыттыыны ылан кэллилэр. Кэпсэтии Үүнэр көлүөнэ тыйаатырын 25 сыллаах үбүлүөйдээх тэрээһиннэрин тула барда. Ол курдук, олунньу ыйга «Күн бытархайа» диэн оскуола оҕолоругар уонна оскуолаҕа киирэ илик саастаах оҕолорго аналлаах театральнай бэстибээл ыытыллыбыта. Кулун тутар ыйга «Көр күлүү кустуга» диэн Өрөспүүбүлүкэтээҕи көр-күлүү бэстибээлэ буолан ааспыта. Ыам ыйыгар «Учууталга махтал» диэн ааттаах Москва уонна Улан-Удэ куораттарга гостуруол олус үрдүк таһымҥа тэриллэн ыытыллыбыта. Бэс ыйыгар «Науруз» диэн тюрк тыллаах омуктар тыйаатырдарын бэстибээлигэр ситиһиилээхтик кыттан кэлбиппит. Бу күннэргэ үбүлүөйбүт түмүк тэрээһиннэрин күндү көрөөччүлэрбитигэр көрдөрөргө бэлэмнэнэ сылдьабыт-сэтинньи 10 күнүгэр 18 чаастан «Учууталга махтал» диэн көрдөөх-күлүүлээх, ырыалаах-үҥкүүлээх капустник-кэнсиэр. Сэтинньи 12 күнүгэр 15 чаастан Саха сирин бастакы Президенин, Саха Өрөспүүбүлүкэтин Судаарыстыбаннай субэһитин Михаил Ефимович Николаев 80 сааһыгар анаммыт «Тускул» оҕо музыкальнай театральнай студиятын мюзикл-испэктээкилэ. Сэтинньи 14 күнүгэр 12 чаастан Василий Каратаев-Харатай Баһылай «Модун Эр Соҕотох» диэн Олоҥхо испэктээкилин сүрэхтэниитэ. Сэтинньи 15 күнүгэр 12 чаастан Реас Кулаковскай «Орто дойду олохтооҕо Ордьоот Оҕонньор» испэктээкилэ. Сэтинньи 16 күнүгэр 18 чаастан ХИФУ «Сэргэлээх уоттара» культурнай киинигэр «Үс түүн» диэн Николай Гоголь «Вий» сэһэнинэн турбут испэктээкил.