Версия для слабовидящих
РФ култууратын үтүөлээх үлэһитэ, СӨ норуодунай артыыһа Алексей Павлов салайааччылаах Үүнэр көлүөнэ тыйаатыра Үрүҥ Тунах Ыһыаҕынан Сахабыт сирин олохтоохторун эҕэрдэлиир! Кэтит киэҥ сыһыылардаах, үгүс сүүрэр үрүйэлэрдээх, барылы баай тыалардаах, аҥаат-муҥаат алаастардаах, айгыр-силик айылҕалаах ытык Сахабыт сиригэр уостубат уйгулаах, быстыбат быйаҥнаах, күөх чээлэй от хойуутук үүнэ турар, үрүҥ илгэ алла турар үтүө-мааны дьыла тосхойуохтун! Уруй-туску, уруй-айхал буолуохтун!
*
Үрүҥ Тунах ыһыахпыт
Үүнэр күнэ бэттэх буоллун,
Алгыс ылар бэлиэ кэммит
Айыыһыта мичик гыннын,
Айыы оҕолорун арчылаатын,
Айылҕа дьоннорун арыаллаатын!
Кэлэр ыччат кэмэ
Күлүмүрдүүр күннээх буоллун,
Үүнэр сүһүөх дьон халлаана
Үрүҥ сарыаллаах буоллун!
Айыы түһэр кэмигэр,
Ыһыах ыһар күммүтүгэр
Үҥэн-сүктэн көрдөстөҕүм буоллун!
Сайдам санаалаах Сахам дьоно
Сайыны уруйдуур күммүт үүммүтүнэн
Ис сүрэхтэн иэйэн туран
Итиитик истиҥник эҕэрдэлиибит!
Уһунча Уола