Версия для слабовидящих
Сэтинньи 10 күнүгэр Үүнэр көлүөнэ судаарыстыбаннай театра төрүттэммитэ 25 сылын бэлиэтээтэ. Театр 1992 сыллаахха Саха Өрөспүүбүлүкэтин Бырабыыталыстыбатын уурааҕынан тэриллибитэ. Үөрүүлээх түгэҥҥэ Саха Өрөспүүбүлүкэтин Ил Түмэнин наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Антонина ГРИГОРЬЕВА, Саха Өрөспүүбүлүкэтин Бырабыыталыстыбатын бэрэссэдээтэлин солбуйааччыта Алексей ДЬЯЧКОВСКАЙ, Саха Өрөспүүбүлүкэтин култууратын уонна духуобунаһын миниистирин бастакы солбуйааччыта Владислав ЛЕВОЧКИН, театрдар дириэктэрдэрэ кыттыыны ыллылар.+
Дьоро киэһэ артыыстар уһуйбут учууталларыгар махтанар түгэннэриттэн саҕаланна.
Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Алексей Дьячковскай театр таһаарыылаах үлэтин сыаналаан туран, Российскай Федерация Федеративнай Сэбиэтин Федерациятын мунньаҕын бэрэссэдээтэлэ Валентина МАТВИЕНКО махтал суругун театр коллективыгар, сүрүн режиссер Александр ТИТИГИРОВКА, «Саха сирэ уонна Россия 385 сыл бииргэ» бэлиэ знагы театр дириэктэригэр Матрена ПАВЛОВАҔА, сүрүн режиссер Александр ТИТИГИРОВКА, режиссер Валентина ЯКИМЕЦКА, артыыстарга Петр АНДРЕЕВКА, Мария ДАНИЛОВАҔА, Саха Өрөспүүбүлүкэтин Бырабыыталыстыбатын махтал суругун артыыс Семен АММОСОВКА туттартаата.
Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Антонина Григорьева бэлиэ түгэнинэн театр коллективын эҕэрдэлээтэ: «Театр салалтата, артыыстара бары биир санаанан үлэлээҥҥит бу 25 сыл устата үрдүк ситиһиилээххит. Инникитин даҕаны айымньылаах үлэҕит таһаарыылаах буоллун. Бу зал көрөөччүнэн туоллун, ытыс тыаһа уҕараабатын», — диэтэ. Саха Өрөспүүбүлүкэтин Ил Түмэн Судаарыстыбаннай мунньаҕын Бэрэссэдээтэлин махтал суругун театр дириэктэригэр Матрена Павловаҕа, артыыс Марина КОРНИЛОВАҔА, Ил Түмэн сис кэмитиэтин бочуотунай грамотатын артыыстарга Екатерина СЕМЕНОВАҔА, Мира ОХЛОПКОВАҔА, Парфений ПЕТРОВКА дохсун ытыс тыаһыгар арыаллатан туттартаата.
Театр 25 сыллаах үлэтэ киэҥ. Бу сыллар устата элбэх спектакль туруоруллан Россия, аан дойду таһымнаах фестивалларга ситиһиилээхтик кыттаннар, Саха сирин киэҥ эйгэҕэ ааттаттылар. Сотору Москваҕа «Кыһыл көмүс Витязь» театр форум-фестивалыгар кыттыыны ылыахтара. Фестивальга «Үс түүн» диэн Николай Гоголь «Вий» сэһэнинэн туруоруллубут спектаклы көрдөрүөхтэрэ. Маны таһынан, Чувашия Чебоксары куорат ыгар Эжен Ионеско «Беранже хоруол» пьесатынан уонна «Дьол тааһа» хотугу норуоттар номохторунан турбут спектакыллары оонньуохтара.
