Версия для слабовидящихТохсунньу 25 күнүгэр, П.А. Ойуунускай аатынан Саха Академическай тыйаатырын лабораторнай саалатыгар, тыйаатыр уус-уран салайааччыта, Арассыыйа норуодунай артыыһа Андрей Саввич Борисов кыттыылаах “Билиҥҥи кэм драматургията” көрсүһүү буолан ааста.
Манна Былатыан Ойуунускай аатынан Саха Академическай тыйаатырын режиссердара аныгы драматурдары, прозаиктары, Саха сирин суруйааччыларын сойууһун чилиэннэрин, драмаҕа холонор эдэр суруйааччылары уонна драматургияны сэргээччи тыйаатыр артыыстарын кытары көрүстүлэр.
Тэрээһиҥҥэ Саха Өрөспүүбүлүкэтин Үүнэр көлүөнэтин судаарыстыбаннай тыйаатырыттан сүрүн режиссер Титигиров Александр Васильевич, литературнай салаа салайааччыта Надежда Федотовна Павлова уонна директор Владимир Николаевич Охлопков сырыттылар.
Андрей Саввич Борисов саха аныгы драматургиятын туругун туһунан санаатын этэн, көрсүһүүнү саҕалаата. Кини, драманы суруйууга аныгы кэм тиэмэтин таарыйыахха уолдьаспытын туһунан эттэ. Ол курдук, сыанаҕа билиҥҥи олох-дьаһах кыһалҕаларын, дьиэ кэргэн иһигэр бэйэ-бэйэҕэ сыһыаннаһыыны пьесаларга арыйан көрдөрүөххэ диэн ыҥырда уонна Саха сиригэр киинэ искусствотын сайдыыта чэчирээбит эбит буоллаҕына, тыйаатыр хайысхата эмиэ тэҥинэн хаамсан иһиэхтээх диэтэ.
Салгыы, театровед, Саха тыйаатырын литературнай салаатын үлэһитэ Надежда Осиповна Осипова 2018 сыллаахтан драматургтарга анаан арыллыбыт семинар уонна биллиилээх драматург Вячеслав Дурненков творческай лабораториятын үлэтин-хамнаһын туһунан сырдатта.
Оттон, Саха тыйаатырын режиссера Роман Дорофеев: «Ханнык баҕарар омукка тиийэр ис хоһоонноох пьеса наада, билигин элбэх историческай быһыы-майгы буола турар, ол туһунан суруйан иһиэх тустаахпыт», — диэн эттэ. Руслан Тараховскай пьесаны суруйууга биир холобуру аҕалан туран, хайдах сытыы теманы арыйыахха, персонажтар кэпсэтиилэрин нөҥүө айымньы сүрүн кыһалҕатын таарыйыахха сөбүн туһунан кэпсээтэ.
Маны сэргэ, Үүнэр Көлүөнэ тыйаатырын сүрүн режиссера Александр Титигиров, Саха Сирин суруйааччыларын сойуустарын чилиэннэрэ Гаврил Андросов, Яна Байгожаева, эдэр драматург Утум Захаров, Саха Өрөспүүбүлүкэтин суруйааччыларын сойууһун чилиэнэ Виктор Павлов-Дуулаҕа Дьуһаал уо.д.а. билиҥҥи кэм драматургиятын тула бэйэлэрин санааларын эттилэр.
Онон, драматурдар, суруйааччылар иннилэригэр сытыы ис хоһоонноох, Аан дойдуга кытта тиийэр кыахтаах драмалары суруйуҥ диэн сыал-сорук туруорулунна.
Үгүс, үтүө уус уран айымньылар үөскээтиннэр диэн алҕыыбыт!
