Интервью главной героини драмы «Таптал» А.И.Софронова — Алампа Айталины Ильиной в газете «Киин куорат»

Подробнее здесь: http://tuz.ykt.ru/?cat=12

Анемподист Иванович Софронов – Алампа төрөөбүтэ 125 сылын бэлиэтиэхпит. Бу бэлиэ күнү көрсө Дьокуускай куоракка номнуо бэлэмнэнэн эрэллэ.

Саха Өрөспүүбүлүкэтин Үүнэр Көлүөнэҕэ театра бу үбүлүөйдээх сылы көрсө бэйэтин көрөөччүлэригэр анаан Алампа “Таптал” драматын таhааран эрэр. Ол курдук, кулун тутар 12 күнүгэр көрөөччүлэр испикьээкили аан бастакынан бу театрга көрүөхтэрэ.

“Таптал” драма чахчы саха дьонугар бэлэх быhыытынан тахсыаҕа. Оруолларга Үүнэр көлүөнэ театрын артыыстара бары кэриэтэ бааллар. Онтон саамай сүрүн Кэтириис оруолугар талааннаах артыыс Айталина Ильина оонньуоҕа.

Бу күннэргэ Айталина Ильинаны кытары көрсөн кэпсэтэ сырыттым:

-“Мин маннык улахан сүрүн оруолу оонньуохпун уруккуттан баҕарарым. Уопсайынан майгы-сигили өттүгэр характердаах оруолу көрдөрөр ордук. Мин бу “Таптал” драманы уруккуттан билэбин, сэҥээрэбин, онон, манна оонньуурбуттан үөрэбин. Билигин испиктээкили көрөөччүлэргэ тиийимтиэ буоларын туhуттан күн аайы бэлэмнэнэбит, артыыстар бары да кыhаллаллар. Кэтириис оруола биллэн турар, олус уустук. Манна дьоло суох таптал көстөр. Кыыс абаҕатыгар иитиллэн баран кэлин үөрэхтээх уолу таптыыр. Ону кини баҕатынан буолбакка, 60 саастаах киhиэхэ эргэ биэрэллэр. Бу киhиэхэ кэргэн тахсан баран сордоох олоҕо саҕаланар. Куруук кырбанар, атаҕастанар. Бу драма саха дьонугар кэрэни харыстыырга аналлаах. Бары бэйэ-бэйэбитин кытары ытыктаhан, убаастаhан, харыстаhан олоруохтаахпыт дии саныыбын.

“Үүнэр көлүөнэ театра” мантан салгыы өссө да көрөөччүлэрин үөрдэр санаалаах. Ол курдук, бу олунньу ыйга: 22 чыыhылаҕа “А зори здесь тихие…”, 23 чыыhылаҕа Аҕа дойдуну көмускээччилэр күннэригэр “Наара Суотартан эҕэрдэ!” шоу-бырагыраамма, 26 чыыhылаҕа Далан “Дьикти Саас”, 27 чыыhылаҕа “Таро – добрый странник” испиктээкиллэр тахсыахтара.

Балаhаны бэлэмнээтэ НАТАЛИ.

“Киин куорат” Олунньу 17 күнэ 2011 сыл. 06(598) №