Көрдөөх-нардаах «Соргулаах суорумньу» кэмиэдьийэни көрдөрдө

Кулун тутар 7 күнүгэр Арассыыйа култууратын үтүөлээх үлэһиттэрэ Матрена, Алексей Павловтар салайааччылаах Саха Өрөспүүбүлүкэтин Үүнэр көлүөнэтин судаарыстыбаннай тыйаатыра, сааскылыы сайаҕас Аан дойду дьахталларын күнүнэн эҕэрдэлээн Хаҥалас улууһун Нөмүгү нэһилиэгэр көрдөөх-нардаах «Соргулаах суорумньу» кэмиэдьийэни көрдөрдө.

Тыа сирин дьонун-сэргэтин, олоҕун-дьаһаҕын, кинилэр үөрүүлэрин-хомолтолорун, ыгар кыһалҕаларын, ыра санааларын бэркэ билэр бөлүһүөк-суруйааччы Миитэрэй Наумов айымньытынан турбут «Соргулаах суорумньу» кэмиэдьийэҕэ сүрүн дьоруойдар — сулумах сылдьар дьон… Бу, тыа сиригэр эрэ буолбакка, аныгы балысханнаах кэмҥэ киин сирдэргэ эмиэ баар биир тыын кыһалҕа… Суорумньуламмакка даҕаны холбоһорго куйаар ситиминэн билсиһэн ыал буолар дьон баарын таһынан, соҕотох сылдьары ордорооччу эмиэ элбэх…

Үүнэр көлүөнэ тыйаатырын сүрүн өрөсүссүөрэ, СӨ ускуустубаларын үтүөлээх диэйэтэлэ Александр Титигиров аныгы дьахтар уонна эр киһи дэбигис холбоһоругар туспа туорайдар, кэккэ мэһэйдэр баалларын сымнаҕастык сырдатар, сатамньылаахтык саралыыр, көргө көһөрөр, бэтиэхэҕэ эргитэр «Соргулаах суорумньу» испэктээкили туруоран, Хаҥалас улууһун Нөмүгү нэһилиэгин олохтоохторун сэргэхситтэ, үгүс түгэннэргэ күллэрдэ.

Сирэр-талар мааны Логлойо Маанньа оруолун толорбут СӨ үтүөлээх артыыската Анна Флегонтова, икки оҕолоох хорсун Кубарыйа Маанньаны оонньообут СӨ култууратын туйгуна Екатерина Семенова, Туйгууна диэн бастыҥ ынахтаах, нарын бэйэлээх Наскыйа Маанньа — Сахаайа Винокурова, сытыы-хотуу Лөглөйө Аана буолан эппит-саҥарбыт, эбиитин кыайыылаахтык сыбааттаабыт СӨ үтүөлээх артыыската Мария Данилова аныгы кэм кэрэ аҥаардарын уобарастарын толору арыйдылар.

Оттон кэргэнэ суох сылдьыбыт тыа уолаттарын: Ырыган бухатыыр диэн ааттаммыт булчуту Үүнэр көлүөнэ тыйаатырын дириэктэрэ, СӨ култууратын туйгуна Владимир Охлопков, тоҕус ынахтаах, тыа сиригэр баайынан биллэр Томтойо холостуойу СӨ үтүөлээх артыыһа Федот Львов, сылгыһыт оруолун толорбут Арсен Семенов оонньообуттарын көрөөччүлэр биһирээтилэр.

Соргулаах суорумньу обургу араас албастарынан үс кэргэнэ суох кыыска холоонноох доҕордорун булларан, сыһыаннарын ыпсаран биэрбитэ эрэли үөскэттэ… Артыыстар оонньуулларын астыммыт, оруолларын ис сүрэхтэринэн биэрбиттэрин ылыммыт көрөөччүлэр ытыс таһыныылара саамай истиҥ махтал буолла.

Үүнэр көлүөнэ тыйаатырын пресс-сулууспата