Версия для слабовидящих
Бүгүн, сэтинньи 14 күнүгэр, саха литературатын төрүттэспит классик суруйааччы, тылбаасчыт, биллэр уопсастыбаннай-култуурунай диэйэтэл, бөлүһүөк Анемподист Иванович Софронов-Алампа төрөөбүтэ 137 сылын көрсө, кини аатынан норуот бириэмийэтин туттарыы дьоро түһүлгэтэ Былатыан Ойуунускай аатынан Саха академическай тыйаатырыгар буолан ааста. Үгэс быһыытынан, бу бириэмийэни култуура уонна искусство араас хайысхатыгар бастыҥнартан бастыҥнарга туттараллар.
Былырыын, 2022 сыллаахха, Саха сирин Үүнэр көлүөнэтин тыйаатырын уус-уран салайааччыта, Арассыыйа култууратын үтүөлээх үлэһитэ, СӨ үтүөлээх уонна норуодунай артыыһа Алексей Павлов «Чаҕылхай артыыс» диэн анал ааттаах Алампа бириэмийэтин ылбыта уонна быйыл ыҥырыылаах ыалдьыт буолан тиийдэ. Маны сэргэ, быйылгы Михаил Щепкин аатынан тыйаатыр үрдүкү үөрэх кыһатын бүтэрбит Үүнэр көлүөнэ тыйаатырын эдэр артыыската Айталыына Яковлева Саха тыйаатырын эдэр артыыскатынаан Анастасия Ивановалыын Алампа «Үрүҥ туллук эрэ мөлбөстүүр» ырыатын ыллаан эйээриттилэр.
Быйыл «Чаҕылхай артыыс» анал ааттаах Алампа бириэмийэтин хаһаайынынан Саха тыйаатырын артыыһа Иннокентий Луковцев уонна Олоҥхо тыйаатырын артыыската Ньургуйаана Маркова буоллулар. Кинилэргэ статуэтканы туттарыы үөрүүлээх түгэнигэр ааспыт сылларга бастыҥ артыыс быһыытынан ааттаммыт артыыстар Алексей Павлов уонна Елена Маркова таҕыстылар. Манна Алексей Павлов сыанаҕа бастакынан тахсан лоп-бааччы эҕэрдэ тылын эттэ уонна Иннокентий Луковцевка бастыҥ баҕа санаатын анаата. Елена Маркова эҕэрдэ тыл бастыҥын анаан туран Алампа бириэмийэтин статуэткатын Ньургуйаана Марковаҕа туттарда.
