Версия для слабовидящих
Аан дойдутааҕы оҕо көмүскэлин күнүн чэрчитинэн Үүнэр көлүөнэ тыйаатырыгар «Таал-Таал эмээхсин» саха норуотун остуоруйатын «ҮКТэн» оҕо тыйаатырын устуудьуйатын иитиллээччилэрэ көрдөрдүлэр.
Испэктээкил иннинэ Үүнэр көлүөнэ тыйаатырын уус-уран салайааччыта, Арассыыйа култууратын үтүөлээх үлэһитэ, Саха Өрөспүүбүлүкэтин норуодунай артыыһа Алексей Павлов кырачаан көрөөччүлэри уонна төрөппүттэри Аан дойдутааҕы оҕо көмүскэлин күнүнэн эҕэрдэлээтэ, бу бэлиэ күн оҕолорго уонна улахан дьоҥҥо суолтатын туһунан кэпсээтэ.
Испэктээкилгэ өс хоһооно, чабырҕах ,оһуохай,таабырын курдук саха тылын барҕа баайа барыта туттуллубут.Туруорааччы режиссер СӨ култууратын туйгуна Прасковья Павлова оҕолорго иккис туруоруута.Бу иннинэ кини «Хотойдор Хоту көтөллөр» Суорун Омоллоон айымньытынан испэктээкилэ Бүтүн Арассыыйатааҕы улахан таһымнаах «Урукку остуоруйаны саҥалыы туруоруу» бэстибээл кыайыылаҕынан ааттаммыта.
Бэстибээл тэрийэр хамыыһыйатын аатыттан «Махтал суругу» устуудьуйа салайааччытыгар,СӨ үтүөлээх артыыскатыгар Мария Даниловаҕа тыйаатыр уус-уран салайааччыта Алексей Павлов үөрүүлээх быһыыга-майгыга туттарда уонна өссө да үрдүк ситиһиилэри,кынаттыыр кыайыылары баҕарда.
